MINGBULOQ TUMANI HOKIMINING QARORI

Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʼrinlarini 2021 yil uchun band qilib qoʼyish toʼgʼrisida

 

“Аholini ish bilan taʼminlash toʼgʼrisida”gi Oʼzbekiston Respublikasi Qonunining 17-moddasi, “Oʼzbekiston Respublikasida nogironlarni ijtimoiy himoya qilish toʼgʼrisida”gi Oʼzbekiston Respublikasi Qonunining
25-moddasi, Oʼzbekiston Respublikasi Prezidentining 2019 yil 5 martdagi “2019 yilda aholi bandligini taʼminlash va yangi ish oʼrinlarini tashkil etish boʼyicha davlat buyurtmasi toʼgʼrisida”gi PQ-4227-son Qarori, Oʼzbekiston Respublikasi Vazirlar Mahkamasining 2017 yil 5 dekabrdagi 965-son qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʼrinlarining eng kam sonini belgilash va zaxiraga qoʼyish tartibi toʼgʼrisida”gi Nizom, shuningdek Oʼzbekiston Respublikasi Bandlik va mehnat munosabatlari vazirining 2019 yil 10 maydagi
19-2019-B-son buyrugʼi bilan tasdiqlangan “Oʼzbekiston Respublikasi Bandlikka koʼmaklashish davlat jamgʼarmasi mablagʼlari hisobidan subsidiya va grantlar ajratish tartibi toʼgʼrisida”gi Nizomga (roʼyxat raqami 3163,
2019 yil 31 may) asosan, ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish maqsadida tumanda 2021 yil uchun ish oʼrinlarini band qilib qoʼyish maqsadida,

 

Q А R O R   Q I L А M А N:

 

1. Tumandagi ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish joylarining eng kam miqdorini belgilash boʼyicha komissiya tarkibi 1-ilovaga muvofiq;

2021 yilda mazkur toifadagi shaxslar uchun ish joylarining eng kam miqdori belgilangan korxonalar, tashkilotlar va muassasalar roʼyxati
2-ilovaga muvofiq tasdiqlansin.

2. “Аholini ish bilan taʼminlash toʼgʼrisida”gi Oʼzbekiston Respublikasi Qonunining 17-moddasiga asosan tumanda ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslar (Keyingi oʼrinlarda ijtimoiy muhofazaga muhtoj shaxslar deb yuritiladi) uchun ish oʼrinlarining eng kam miqdori
(2-ilova) xodimlarning roʼyxat boʼyicha oʼrtacha 316 nafarni tashkil etadigan 9,7 foiz miqdorida, shu jumladan:

nogironlar uchun 3,2 foiz (104 nafar, yuqorida koʼrsatilgan ish oʼrinlariga tumanda nogironlar ishga joylashish boʼyicha talabi 14 ta boʼlganligi sababli, kelgusida 90 ta ish oʼrinni umumiy oʼrta va oʼrta maxsus, kasb-hunar taʼlimi muassasalarini tamomlagan yoshlar, shuningdek, oliy taʼlim muassasalarining davlat grantlari boʼyicha taʼlim olgan bitiruvchilari uchun band etib qoʼyilsin);

umumiy oʼrta va oʼrta maxsus, kasb-hunar taʼlimi muassasalarini tamomlagan yoshlar, shuningdek, oliy taʼlim muassasalarining davlat grantlari boʼyicha taʼlim olgan bitiruvchilari uchun 4,7 foiz (152 nafar); ‎‎

oʼn toʼrt yoshgacha va nogiron bolalari boʼlgan yolgʼiz va koʼp bolali ota-onalar uchun 1,4 foiz (46,5 nafar);

pensiya oldi yoshidagi shaxslar uchun 0,1 foiz (4,5 nafar);‎‎‎

safarbarlik chaqiruvi zaxirasida xizmatni oʼtagan va Oʼzbekiston Respublikasi Qurolli Kuchlari saflaridan muddatli harbiy xizmatdan boʼshatilgan shaxslar uchun 0,1 foiz (2 nafar);

‎‎‎‎‎‎‎jazoni ijro etish muassasalaridan ozod qilingan yoki sudning qaroriga koʼra tibbiy tusdagi majburlov choralari qoʼllanilishidan ozod qilingan shaxslar uchun 0,1 foiz (3,5 nafar);‎

‎‎‎‎ijtimoiy muhofazaga muhtoj shaxslarning boshqa toifalari,

shu jumladan odam savdosi qurbonlari uchun 0,1 foiz (3,5 nafar) miqdorida ish oʼrinlari zahirasi belgilansin.

3. Ijtimoiy muhofazaga muhtoj shaxslar uchun ish oʼrinlari sanitariya-gigiena meʼyorlariga va xodim oʼz mehnat majburiyatlarini toʼsiqsiz bajarishini taʼminlaydigan mehnat qilish sharoitlariga, shu jumladan, quyidagilarga muvofiq boʼlishi kerak:

- 14 yoshgacha va nogiron bolalari boʼlgan yolgʼiz va koʼp bolali ota-onalar uchun – bolalarni tarbiyalash va mehnat majburiyatlari boʼyicha majburiyatlar bajarilishini birga qoʼshib olib borish imkonini beruvchi ishning moslashuvchan jadvaliga ega;

- umumiy oʼrta va oʼrta maxsus, kasb-hunar taʼlimi muassasalarini tamomlagandan keyin kasbni egallagan yoshlar, shuningdek, oliy taʼlim muassasalarining davlat grantlari boʼyicha taʼlim olgan bitiruvchilari uchun – ularning kasbiy tayyorgarligiga muvofiq;

- safarbarlik chaqiruvi zahirasida xizmatni oʼtagan va Oʼzbekiston Respublikasi Qurolli Kuchlari saflaridan muddatli harbiy xizmatdan boʼshatilgan shaxslar uchun – ularning professional tayyorgarligiga mos;

- nogironlar uchun – mehnat sharoitlari boʼyicha attestatsiyadan oʼtkazilgan va xodimga ularning sogʼligʼi holatini va mehnat faoliyatiga toʼgʼri kelmaydigan belgilangan zidliklar hisobga olingan holda mehnat operatsiyalarini toʼsiqsiz bajarish imkonini beradigan;

- pensiyaoldi yoshidagi shaxslar uchun – ularning kasbiy tayyorgarligiga mos boʼlgan yoki maxsus malakani talab etmaydigan;

- jazoni ijro etish muassasalaridan yoki sudning qaroriga koʼra tibbiy tusdagi majburlov choralari qoʼllanilgan shaxslar uchun – ularning kasbiy tayyorgarligini hisobga olgan holda yoki maxsus malakani talab etmaydigan;

- odam savdosi qurbonlari uchun – ularning kasbiy tayyorgarligini hisobga olgan holda yoki maxsus malakani talab etmaydigan.

4. Quyidagi ish oʼrinlari band qilib qoʼyiladigan kasblar va lavozimlar etib belgilansin:

muhandis, iqtisodchi, hisobchi, huquqshunos, zootexnik, agronom, shifokor, hamshira, kichik tibbiy xodim, ish yurituvchi, oʼqituvchi, tarozibon, elektrik, farrosh, oʼtyoqar, obodonlashtirish ishchisi, omborchi, EHM operatori, yukchi, ishchi, bogʼbon, qorovul.

5. Tumandagi mavjud korxona, tashkilot va muassasalarning rahbarlari:

Oʼzbekiston Respublikasi Vazirlar Mahkamasining 2017 yil
5 dekabrdagi 965-son qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʼrinlarining eng kam sonini belgilash va zahiraga qoʼyish tartibi toʼgʼrisida”gi Nizomga muvofiq ushbu qarorning 2-ilovasida koʼrsatilgan ish oʼrinlari tashkil etilishini taʼminlasin;

2021 yil boshlanishidan kamida 10 kun oldin, zaxiraga qoʼyiladigan umumiy ish oʼrinlari sonining kamida 25 (yigirma besh) foizi ijtimoiy muhofazaga muhtoj shaxslarni ishga joylashtirish uchun zaxiraga qoʼyilishini va tayyorligini taʼminlasin, shuningdek, bu haqda yil boshlangunga qadar tuman Аholi bandligiga koʼmaklashish markazini xabardor qilsin;

- ijtimoiy muhofazaga muhtoj shaxslar uchun ish oʼrinlarining qolgan qismini zaxiraga qoʼyish tashkilot (ish beruvchi) tomonidan 2021 yilning birinchi choragi mobaynida taʼminlasin, bu haqda tuman Аholi bandligiga koʼmaklashish markaziga birinchi chorak tamom boʼlgandan keyin 10 kundan kechikmay xabardor qilsin;

- har oyda hisobot oyidan keyingi oyning 5-kunigacha tuman Аholi bandligiga koʼmaklashish markaziga “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʼrinlarining eng kam sonini belgilash va zahiraga qoʼyish tartibi toʼgʼrisida”gi Nizomning
5-ilovasiga muvofiq shakl boʼyicha axborot taqdim etsin;

- ijtimoiy muhofazaga muhtoj shaxslarni ishga joylashtirish uchun ish oʼrinlari tayyorligi toʼgʼrisida axborot taqdim etilmasligi, teng darajada zaxiraga qoʼyiladigan ish oʼrinlarining belgilangan soni hisobiga ishga joylashtirish uchun ish oʼrinlarining amalda tayyor emasligi tuman Аholi bandligiga koʼmaklashish markazi tomonidan tuman hokimining qarori bajarilmasligi sifatida qaralishi lozimligi qayd etilsin.

6. Tuman hokimining ijtimoiy muhofazaga muhtoj shaxslar uchun ish oʼrinlarining eng kam sonini belgilash boʼyicha ushbu qarori bajarilmaganda, shuningdek, bunday shaxslarni ishga qabul qilish asossiz ravishda rad etilganligi uchun tashkilot, korxona va muassasalarning mansabdor shaxslariga nisbatan Oʼzbekiston Respublikasining amaldagi qonun hujjatlariga asosan maʼmuriy javobgarlik belgilanganligi alohida qayd etilsin.

7. Tuman aholi bandligiga koʼmaklashish markazi “Oʼzbekiston Respublikasi Bandlikka koʼmaklashish davlat jamgʼarmasi mablagʼlari hisobidan subsidiya va grantlar ajratish tartibi toʼgʼrisida”gi Nizomga (roʼyxat raqami 3163, 2019 yil 31 may) asosan subsidiyalar ajratib berish tartibi amaliyotga joriy etilganligini hisobga olib, ijtimoiy ehtiyojmand aholi qatlamlariga mansub shaxslarni kvotalangan eng kam sondan ortiq miqdorda ishga qabul qilgan tashkilotlarga – har bir xodim uchun 12 oy davomida har oyda bazaviy hisoblash miqdorining 2 baravari miqdorida haq toʼlashni taʼminlasin.

8. Tuman Аholi bandligiga koʼmaklashish markazi (O.Qodirov) mazkur qarorni besh kun muddatda qarorning 2-ilovasida koʼrsatilgan tashkilot, korxona va muassasalarning rahbarlari eʼtiboriga yetkazilishini taʼminlasin.

9. Mazkur qaror “Mingbuloq” gazetasida rasman eʼlon qilinsin va tuman hokimligining rasmiy veb saytiga joylashtirilsin.

10. Ushbu qaror rasman eʼlon qilingan kundan boshlab 3 oydan keyin kuchga kiradi.

11. Mazkur qaror ijrosini nazorat qilish tuman hokimining birinchi oʼrinbosari D.Аbdullaev zimmasiga yuklatilsin.

 

 

Tuman hokimi                                                             N.Xudoyberdiyev